‘एसआयपी’द्वारे गुंतवणूक कशी करायची याबाबत आपण मागील एका लेखात माहिती घेतली होती. ‘एसआयपी’द्वारे गुंतवणूक केल्यास कसा फायदा होतो, याबाबत आज पाहू या.... ‘समृद्धीची वाट’ या सदरात...
..........
एसआयपी म्हणजे सिस्टिमॅटिक इन्व्हेस्टमेंट प्लॅन. ठराविक कालावधीने (वारंवारिता) एक ठराविक रक्कम आपण निवडलेल्या म्युच्युअल फंडाच्या योजनेत ठराविक कालावधीसाठी अथवा आपणास हवे तोपर्यंत गुंतविणे, म्हणजे एसआयपी. ‘एसआयपी’द्वारे गुंतवणूक कशी करायची याबाबत आपण मागील एका लेखात माहिती घेतली होती. ‘एसआयपी’द्वारे गुंतवणूक केल्यास कसा फायदा होतो, याबाबत आज पाहू या. पाच प्रमुख म्युच्युअल फंडांच्या इक्विटी स्कीममध्ये दरमहा एक हजार रुपये इतकी गुंतवणूक केल्यास अशा गुंतवणुकीतून किती परतावा मिळाला, हे सोबत दिलेल्या आकडेवारीवरून आपल्या लक्षात येईल.
(तक्त्यातील माहिती - केलेली गुंतवणूक (रु.), मिळालेला परतावा (रु.) आणि परताव्याची टक्केवारी या क्रमाने)
इथे एक गोष्ट लक्षात घेतली पाहिजे, की प्रत्येक फंडाच्या गुंतवणुकीतून मिळणारा परतावा कमी-अधिक असून, तो त्या फंडाने गुंतवणुकीसाठी निवडलेल्या कंपन्यांवर व त्या कंपन्यांच्या कामगिरीवर अवलंबून असतो.
आपण दरमहा एक हजार रुपये १२, ३६ व ६० महिने रिकरिंग पद्धतीने बँकेत गुंतविल्यास मिळणारी रक्कम पुढीलप्रमाणे असेल सध्याचा व्याजदर साडेसहा टक्के धरून अनुक्रमे १२,३६४.०३, ३९,६३१.६८ आणि ७०,६७३.९७ रुपये एवढा परतावा मिळेल.
यावरून आपल्या लक्षात येईल, की विविध म्युच्युअल फंडांतील गुंतवणुकीवर मिळणारा परतावा जरी कमी-अधिक होत असला, तरी दीर्घकालीन गुंतवणूक ही पारंपरिक गुंतवणुकीपेक्षा निश्चितच फायदेशीर ठरते; मात्र यातील जोखीम शेअर बाजारातील चढ-उतारावर अवलंबून असते आणि परताव्याबाबत खात्री देता येत नाही. असे असले, तरी पाच वर्षे किंवा त्याहून अधिक कालावधीसाठीच्या गुंतवणुकीपासून सुमारे १५ ते १६ टक्के इतका परतावा मिळू शकतो.
थोडक्यात असे म्हणता येईल, की आपली भविष्यातील गरज विचारात घेता (उदा. मुलांचे शिक्षण, त्यांचे विवाह, आपली रिटायरमेंट) आवश्यक असलेल्या रकमेची तरतूद करण्याच्या दृष्टीने ‘एसआयपी’द्वारे म्युच्युअल फंडातील गुंतवणूक निश्चितच फायदेशीर ठरू शकते; मात्र एकाच म्युच्युअल फंडात सर्व रक्कम गुंतविण्यापेक्षा चार किंवा पाच फंडांमध्ये ती विभागून गुंतवणे अधिक लाभदायी ठरते. यामुळे जोखीम कमी होते. शक्य तितकी जास्त रक्कम शक्य तितक्या जास्त कालावधीसाठी म्युच्युअल फंडात ‘एसआयपी’द्वारे गुंतवल्यास आपले आर्थिक उद्दिष्ट साध्य करता येते.
- सुधाकर कुलकर्णी
(लेखक पुण्यातील सर्टिफाइड फायनान्शियल प्लॅनर आहेत.)
(शेअर बाजार, तसेच म्युच्युअल फंडातील गुंतवणूक जोखीमपूर्ण आहे. ‘समृद्धीची वाट’ या सदराचा उद्देश वाचकांना गुंतवणुकीसंदर्भातील अशा विविध बाबींची माहिती करून देऊन दिशा दाखवणे हा आहे. कोणत्याही प्रकारची गुंतवणूक करताना वाचकांनी स्वतःच्या जबाबदारीवरच करावी. त्यासाठी ‘बाइट्स ऑफ इंडिया’ कोणत्याही प्रकारे जबाबदार नसेल.)